Эрхэм хүндэт Монголын Архитекторуудын Эвлэлийн үе үеийн удирдлагууд, ахмад архитекторууд, эрхэм гишүүд, хамтран ажиллагч байгууллага, аж ахуйн нэгжүүд, салбарын нийт хамт олон Та бүхэндээ Монголын Архитекторуудын Эвлэлийн 70 жилийн түүхт ойн баярын мэндийг өргөн дэвшүүлье.

Манай байгууллага 1956 онд байгуулагдсан цагаасаа эхлэн архитекторуудын мэргэжлийн эрх ашгийг хамгаалах, мэдлэг ур чадварыг хөгжүүлэх, салбарынхаа хөгжил дэвшлийг дэмжих, нийгэмд архитектурын үнэ цэнийг түгээн дэлгэрүүлэх үйлсэд тасралтгүй хүчин зүтгэсээр ирсэн билээ.

Өнөөдөр бид хотжилт, уур амьсгалын өөрчлөлт, технологийн хурдацтай хөгжлийн шинэ эрин үед ажиллаж байна. Энэ цаг үед бид зөвхөн барилга байгууламж төлөвлөхөөс гадна хүний амьдрах орчны чанар, нийгмийн сайн сайхан байдал, соёлын өвийн хадгалалт хамгаалал, тогтвортой хөгжлийн асуудалд хариуцлагатай оролцогч байх шаардлагатай болж байна.

Монголын Архитекторуудын Эвлэлийн Ерөнхийлөгчийн хувьд миний бие эвлэлийнхээ эрхэм зорилго, үнэт зүйлсийг улам бататгаж, гишүүддээ чиглэсэн үйл ажиллагааг өргөжүүлэх, мэргэжлийн боловсрол, тасралтгүй сургалт, олон улсын хамтын ажиллагааг хөгжүүлэх, залуу архитекторуудыг дэмжих, архитекторуудын дуу хоолойг төр, нийгмийн түвшинд хүргэхэд онцгойлон анхаарч ажиллах болно.

Мөн зөвхөн гишүүддээ үйлчлэх бус, салбарын нийгмийн хариуцлагыг дээшлүүлэх, иргэдийн ая тухтай, аюулгүй, эрүүл орчинд амьдрах нөхцөлийг бүрдүүлэх, үндэсний архитектурын өв уламжлал, үнэт зүйлсийг хамгаалан хөгжүүлэхэд бодит хувь нэмэр оруулахыг эрхэм зорилгоо болгон ажиллана. Энэхүү эрхэм зорилгын төлөө үе үеийн архитекторууд, эрдэмтэн судлаачид, залуу мэргэжилтнүүд, хамтран ажиллагч байгууллагуудтайгаа нягт хамтран ажиллаж, Монголын архитектурын салбарын хөгжилд үнэтэй хувь нэмэр оруулах болно.

Та бүхэндээ эрүүл энх, аз жаргал, бүтээлч хөдөлмөрийн өндөр амжилтыг хүсэн ерөөе.

Сайн үйлс бүхэн дэлгэрэх болтугай.

Хүндэтгэсэн,

Г.ЦОВООДАВАА

Монголын Архитекторуудын Эвлэлийн Ерөнхийлөгч